08/09/2017 - 10:19:15 am
دراما عرس قاسم و أكابر......
موقع هنا

دراما عرس قاسم و أكابر......

 

قاسم تأخر بالزواج وشايف اغلب رفقاتوا تأهلوا وعايشين حياتهن بضحك وصهصلي والكل منهن يحرنق فيه.

 

اسطلى على بيو منشان  يجوزو أسوة بولاد جيلو ،، وبيو ما عندو شي، وكل الحجة انو غرفه ما عنا نقيعدك فيها انت و بنت عمك ،، ويقلو يا بيي بلكي تستنالك شوي لحتى نقصبلك شي غرفة حد هالدار تفتح عينك فيها قدام الناس.

 

وعلى قد ما نق قاسم واسطلى وماحن، بهالمعثر بيو.. وافق الاخير وقلو ،، افش الك غير غرفة الطحش تنضفها وتشقع الكياس الي فيها وتضبط سطحها القصيب، لانو مفخوت من زاويتو الغربية.

 

المهم بلا طولة سيري وفتيلي ،، كان قاسم منيشن على أكابر بنت ابن عم بيو ، وفي بينهن تطليعات وضحكات لأكابر تسويها من تحت الفوطه..

 

وافقوا اهل اكابر على قاسم بعد كده معتبره وكييف قاسم وبسرعه بسرعه ضبط غرفة الطحش وشقع كياس البذار وسفتهن وخلا مطرح واسع لفرشتو وفرشة عروستو اكابر ،، والسطح ضبطو كيف مكان بشوية قصب ولقح فوقهن بساط عجمي قديم، ومنهون للشتى الله بيفرجها..

 

حددوا يوم العرس وطلعوا عالسويدا واشترى قاسم شنتان جديد و لأكابر اشترالها شقفة بدلة عربي زهر، فرحت فيها كثير، وكم غرض خاصين جابتهن مع الجهاز ،، و أجت الصبايا تباركلها لأكابر بالتنورة الزهر ويدعولها بالتوفيق.

 

دار قاسم وفتل على كل اهل البلد وعزمهن على الغدا والسهرة وتم العرس والكل شارك وغنى ودبك بفرحة قاسم وحيث انو قاسم وبيو مسلفين كل القرايب واهل البلد.

 

ذبحوا ذبيحتين وكل الناس اكلت وشبعت واثنت على كرم بوقاسم ،، حتى الكلاب غرب الدار اتجتمعت وأكلت نصيبها من الكروش والمصارين..

 

وبأخر السهرة كان قاسم عم يعد الثواني ليفوت مع عروستو على عش الزوجيه وتبدء حياة السعادة والنعيم الموعود.

 

المهم فاتوا على الغرفة الى كانت سابقا غرفة الطحش وصارت مقبوله الى حد ما ،، وضووا  السراج وحالة خجل لا توصف بينهن وعمة اكابر ضلت ضايفة عند ام قاسم عم تستنى العلامه المقدسة ومهيي حالها للزلاغيط.

 

قاسم و أكابر بالغرفة مبسوطين عم يتبادلوا النظرات والتغميقات ويخوضوا غمار التجربة الاولى بعدما دقروا باب الغرفه.. و زوكرة او مذرية الكلاب غرب الدار علقانه معركة ما الها أخر على الكروش وبقايا العظم ومضينها غرغرة حوالي الدار ونبيح و عوعصه و تزريد.

 

وفجأه غروا بعظهن تلاث اربع كلاب على درجات الحجر الواصلين لسطح الدار وصاروا فوق غرفة الطحش تماما ،، وتقوم ترقيعة السطح تهفت بتلاثة منهن ويهبدوا على قاسم و أكابر العرسان الجداد

 

ويجوا بينهن وكل واحد فيهن قد الضبع وبينهن كلبه مخلفة جديد بتنتف تنتيف.

 

يا علقتك يا قاسم ويا فرحه ما كملت ، مصيبة نزلت عليك من السما ، كان هو وعروستو لحالهن بأجمل اللحضات،، صار عندو بفرشة الزوجية عروس، وكلبين وكلبي نفسي على العتم وما من مغيث، والسراج طفى من المكاورة والحيصة الي صارت.

 

عروستو تخبت وراه وتنورة الزهر ، كانت زهر !!!

 

صارت حديقة الوان اصفر وبني، ومن جميعو وهو ويلو وطبيلو شي بدو يحمي العروس وشي يدور بالعتم على دقر الباب ليفتحو ليطشش الكلاب يلي كملت عليه نبيح وتزريد وتهمير بهالغرفه. وهو خايف والكلاب خايفه

 

بوقاسم فزع على الصوت والبكا والنبيح من الغرفه وحاول يفتح الباب من برا بس قاسم أمكن الدقر منيح من جوا

 

المهم بعد جهدا جهيد بعد ما لقط نفسو، رفع عروستو على كياس البذار و زحلف صوب دقر الباب وفتحو ونهر على الكلاب لتطلع وتفكو من هالكارثة.

 

كان كل سلاحو كلمة وشت وشت .. وشت

 

طلعت الكلاب ورجعت لورى الدار وكملت معركتها وعمة العروس يلي كانت عم تستنى الشرشف الممهور بمهر العفة والطهاره ،،، فزعت على نبيح الكلاب من قلب الغرقه ،، وقاسم طلع بعدة اصابات بعد انتهاء المعركة منها شرم بذينتو ههههههههه.

 

ظل قاسم بعد هذيك الليلة شي سنه يفيق من نومو بنص الليل ويصرخ وشت وشت .. وشت

 

ومرت الايام والسنين وبعد الاف المحاولات الله رزقهن بولد اسم الله عليه ، كان شكلو و عقلو خليط وناتج لتلك الليله الحلم

 

وبسلامتكن

 

الاسم الكامل :
مكان الاقامة :
التعليق :
هام جدا : ادارة الموقع تحتفظ لنفسها الحق لالغاء التعليق او حذف بعض الكلمات منه في حال كانت المشاركة غير اخلاقية ولا تتماشى مع شروط الاستعمال. نرجو منكم الحفاظ على مستوى مشاركة رفيع.
ما هو رأيك ؟

X أغلق
X أغلق